Grétar Ari Guðjónsson fór sannarlega hamförum í marki franska liðsins Nice í kvöld þegar það vann Billere, 28:22, á útivelli í B-deildinni í kvöld. Hann varði 17 skot og var með 45% hlutfallsmarkvörslu þegar upp var staðið. Nice var fimm mörkum yfir að loknum fyrri hálfleik, 16:11, og hefur færst upp í sjöunda sæti með 10 stig eftir 11 leiki sem er betri staða en liðið hefur verið í um langt skeið.
„Planið hjá mér heppnaðist vel í kvöld. Þeir voru að skjóta þar sem ég bjóst við skotunum. Það var ekki fyrr en varamennirnir komu inná þegar á leið sem þetta varð erfiðara því ég hafði ekkert séð þá spila,“ sagði Grétar Ari við handbolta.is eftir stórleikinn í kvöld en hann hefur átt frábært tímabil með liðinu það sem af er þótt leikurinn í kvöld hafi tekið öðrum leikjum fram hjá Hafnfirðingnum sem gekk til liðs við Nice í sumar sem leið.
„Ég er fyrst og fremst ánægður með að hafa náð sigri. Við erum í sjöunda sæti núna sem er það besta sem þessi klúbbur hefur nokkurn tímann náð,“ sagði Grétar Ari Guðjónsson, markvörður Nice í Frakklandi.
