Grunur um að smit hafi borist milli manna í kappleik

Grunur er um að kórónuveirusmit hafi borist á milli leikmanna í kappleik í dönsku úrvalsdeildinni í handknattleik um síðustu helgi. Mark Nikolajsen, leikmaður Lemvig hefur nú greinst smitaður, en hann atti kappi við Emil Madsen, leikmann bikarmeistara GOG, í leik á laugardaginn. Madsen greindist jákvæður á mánudaginn ásamt þjálfara GOG. Á síðasta föstudag var greint smit í tveimur leikmönnum öðrum GOG og fóru þeir rakleitt í sóttkví. Madsen var einkennalaus við skimun á föstudag.

Frá þessu er greint á vef TV2 í Danmörku.

Allir leikmenn Lemvig fóru í skimun í gær og reyndust neikvæðir. Í morgun fann Nikolajsen til einkenna og gekkst í skyndi undir skimun sem nú liggur fyrir niðurstaða í. Hann er jákvæður, þ.e. smitaður af kórónuveirunni.

Vissulega er ekki hægt að slá föstu um að Nikolajsen hafi smitast af Madsen en þeir léku hvor á móti öðrum oft og tíðum, jafnt í vörn sem sókn.

Frank Smith, mótastjóri danska handknattleikssambandsins, segir við TV2, að fleiri tilfelli hafi komið upp á leiktíðinni að smitaðir leikmenn hafi tekið þátt í leikjum, vissulega án vitneskju fyrr en eftir á. Ekki hafi verið hægt að sanna í eitt skipti að þeir hafi smitað andstæðinga sína eða samherja.

Lemvig mætir Kolding í kvöld í dönsku úrvalsdeildinni. Liðin óskuðu eftir að leiknum yrði frestað en ekki var fallist á óskina. Reglur í Danmörku kveða á um að til þess að fá leik frestað verði a.m.k. fimm leikmenn liðs að vera smitaðir til að forsendur séu fyrir hendi til frestunar.

Allir leikmenn, að minnsta kosti í úrvalsdeildum karla og kvenna í Danmörku, eru skyldaðir að fara í skimun einu sinni í viku. Hefur svo verið frá upphafi keppnistímabilsins. Leikmenn liða sem taka þátt í Evrópukeppni félagsliða hafa farið oftar í skimun í viku hverri.

- Auglýsing -

Nýjustu fréttir

- Auglýsing -