Guðjón Valur, Elliði Snær og félagar gefa ekkert eftir

Elliði Snær Viðarsson leikmaður Gummersbach. Mynd/Nastasja Kleinjung / VfL Gummersbach

Lærisveinar Guðjóns Vals Sigurðssonar í Gummersbach halda áfram að elta HSV Hamburg eins og skugginn í toppbaráttu 2. deildar þýska handknattleiksins. Í kvöld unnu þeir liðsmenn Konstanz, 37:30, á útivelli. Gummersbach hefur þar með 27 stig eftir 15 leiki og er aðeins stigi á eftir Hamburg sem hefur leikið einum leik fleira. Lübbecke og Lübeck-Schwartau koma þar á eftir í þriðja og fjórða sæti með 22 og 20 stig.


Elliði Snær Viðarsson lék að vanda með Gummersbach og stóð fyrir sínu, jafnt í vörn sem sókn. Hann skoraði þrjú mörk í fimm tilraunum.


Aron Rafn Eðvarðsson náði sér ekki vel á strik í marki Bietigheim sem tapaði naumlega fyrir Elbflorenz, 29:28, á heimavelli. Aron Rafn stóð meirihluta leiksins í marki Bietigheim og varði fimm skot, 20% hlutfallsmarkvarsla. Örvhenta skytta, Mindaugas Dumcius sem lék með Akureyri handboltafélagi fyrir nokkrum árum skoraði fimm af mörkum Elbflorenz en félagið er með bækistöðvar í Dresden.


Bietigheim, sem Hannes Jón Jónsson þjálfari fram til vors, er í sjöunda sæti með 16 stig eftir 15 leiki.

- Auglýsing -

Nýjustu fréttir

- Auglýsing -