Þriðja leikinn í röð lék Guðmundur Bragi Ásþórsson á als oddi hjá ungmennaliði Hauka í Grill 66-deildinni í handknattleik í dag þegar hann skoraði 14 mörk í tíu marka sigri Hauka á Vængjum Júpíters í Schenkerhöllinni á Ásvöllum, 32:22. Þetta var um leið fyrsti sigur Hauka u á keppnistímabilinu og annað tap Vængjanna í röð en þeir lögðu Hörð frá Ísafirði í fyrstu umferð.
Þetta er í annað sinn á keppnistímabilinu sem Guðmundur Bragi skorar 14 mörk í leik og er hann alls búinn að skora 39 mörk í þremur leikjum. Hann er þar með markahæsti leikmaður Grill 66-deildarinnar. Guðmundur Bragi er fimm mörkum á undan Kristjáni Orra Jóhannssyni, leikmanni Kríunnar.
Leikmenn Vængja héldu í við Hauka í fyrri hálfleik í viðureign liðanna í dag. Í þeim síðari skildu leiðir og sigurinn var afar öruggur. Varnarleikur Hauka var traustur og tókst þeim að loka vel á sóknarmenn Vængja sem áttu erfitt uppdráttar. Þá átti Andri Scheving góðan leik í marki Hauka að baki sterkri vörn.
„Leikurinn var frekar daufur og ekki mikið fyrir augað. Haukarnir bara sterkari og við fundum illa lausnir gegn þéttri vörn þeirra,“ sagði Arnór Ásgeirsson annar þjálfara Vængja Júpíters við handbolta.is í kvöld.
Mörk Hauka u: Guðmundur Bragi Ásþórsson 14, Kristófer Máni Jónasson 4, Þorfinnur Máni Björnsson 3, Jón Brynjar Björnsson 3, Egill Eiríksson 2, Ari Sverrir Magnússon 2, Þórarinn Þórarinsson 1, Sigurður Rafnsson 1, Steinn Kári Pétursson 1, Jóhannes Damian Patreksson 1.
Mörk Vængja Júpíters: Arnþór Örvar Ægisson 6, Einar Örn Hilmarsson 5, Aron Heiðar Guðmundsson 4, Gísli Steinar Valmundsson 2, Jón Byrnjar Björnsson 1, Brynjar Loftsson 1, Leifur Óskarsson 1, Albert Garðar Þráinsson 1, Finnur Jónsson 1.
