Guðmundur Þórður ráðinn fram yfir ÓL 2024

Róbert Geir Gíslason, framkvæmdastjóri HSÍ, Guðmundur B. Ólafsson, fiormaður HSÍ, Guðmundur Þórður Guðmundson, landsliðsþjálfari og Gunnar Magnússon. Mynd/Ívar

Guðmundur Þórður Guðmundsson heldur áfram störfum sínum sem landsliðsþjálfari karla í handknattleik. Tilkynnt var fyrir stundu að samstarf hans við Handknattleikssamband Íslands hafi verið framlengt til ársins 2024. Miðað er við Ólympíuleikana í París það sumar.

Með honum verða áfram Ágúst Þór Jóhannsson og Gunnar Magnússon til aðstoðar. Gunnar hefur verið samstarfsmaður Guðmundar Þórðar í nærri tvo áratugi en Ágúst kom inn í þjálfarateymi karlalandsliðsins fyrir Evrópumeistaramótið sem fram fór í janúar.


Guðmundur B. Ólafsson formaður HSÍ sagði á blaðamannafundi að ánægja ríkti vegna þess að samstarfinu væri haldið áfram. Landsliðið væri á mjög góðri leið undir stjórn Guðmundar eins og árangurinn á EM í Ungverjalandi undirstrikaði. Engin launung væri að stefnan væri tekin á Ólympíuleikana í París 2024 og við hana miðaðist samningurinn við Guðmund Þórð.

Landsliðið æfir þessa viku hér heima undir stjórn Guðmundar Þórðar. Næstu landsleikir verða eftir um mánuð, annað hvort við Austurríki eða Eistland í undankeppni heimsmeistaramótsins. Það skýrist á sunnudaginn hvort það verður landslið Austurríkismanna eða Eistlendinga sem mætir íslenska liðinu.


Guðmundur Þórður hefur verið landsliðsþjálfari karla frá 2018. Áður var hann þjálfari landsliðsins frá 2001 til 2004 og aftur frá 2008 til 2012.

- Auglýsing -

Nýjustu fréttir

- Auglýsing -