- Auglýsing -
Hinum þrautreynda þjálfara Gunnari Gunnarssyni hefur verið sagt upp starfi þjálfara kvennaliðs Hauka eftir tvö ár í brúnni. Haukar greindu frá þessu í kvöld og segir í tilkynningu að deildin hafi ákveðið að nýta sér uppsagnarákvæði í samningi sínum við Gunnar.
Ekki kemur fram í tilkynningu Hauka hver taki við þjálfun liðsins af Gunnari.
Gunnar tók við þjálfun Hauka sumarið 2020 af Árna Stefáni Guðjónssyni. Undir stjórn Gunnars hefur liðið tekið framfaraskref og var til að mynda ekki langt frá því að ná a.m.k. oddaleik við Íslandsmeistara KA/Þórs í 1. umferð úrslitakeppni Olísdeildarinnar á dögunum.
Haukar voru lengi í fjórða sæti Olísdeildarinnar í vetur en máttu gera sér að góðu sjötta sæti þegar upp var staðið en fáum stigum munaði á fjórða og sjötta sæti. Haukar höfnuðu einnig í sjötta sæti á síðasta ári.
Gunnar hefur víða þjálfað á síðustu 30 árum, bæði hér heima og á Norðurlöndunum.
- Auglýsing -
