Hafþór Már hefur samið við Rostock

Hafþór Már Vignisson gengur til liðs við HC Empor Rostock í sumar. Mynd/HC Empor Rostock

Hafþór Már Vignisson handknattleiksmaður hjá Stjörnunni hefur samið við þýska 2. deildarliðið HC Empor Rostock til tveggja ára. Hafþór Már gengur til liðs við félagið í sumar þegar tveggja ára vist hans hjá Stjörnunni verður lokið. HC Empor Rostock hefur verið í hópi fremstu liða í 2. deildinni undanfarin ár og situr í áttunda sæti af 20 um þessar mundir með 27 stig eftir 26 leiki, 11 stigum á eftir Gummersbach og Nordhorn sem eru í tveimur efstu sætum.


„Ég hafði verið að skoða í kringum mig þegar HC Empor Rostock kom inn í myndina og eftir að hafa litið á aðstæður þá er ég ekki í vafa um að þetta er rétta tækifærið fyrir mig,“ sagði Hafþór Már í samtali við handbolta.is í dag.


„Ég fæ stórt og gott hlutverk hjá HC Emport Rostock og er bara spenntur að takast á við þennan áfanga á ferlinum,“ sagði Hafþór Már ennfremur en hann sótti félagið heim á dögunum og leist vel á það sem fyrir augu bar.

Hafþór Már er 22 ára gamall. Auk þess að leika með Stjörnunni hefur hann leikið með ÍR og Akureyri handboltafélagið en Hafþór Már er Þórsari að upplagi.

„Mikill áhugi er fyrir handbolta í borginni sem er vitanlega mikill plús. Félagið er rótgróið og metnaður er mikill. Keppnishöllin er nýleg og rúmar fimm þúsund áhorfendur. Umgjörð og utanumhald hjá félaginu virðist vera eins og best verður á kosið,“ sagði Hafþór Már við handbolta.is.


Hafþór Már er næst markahæsti leikmaður Stjörnunnar í Olísdeildinni á keppnistímabilinu með 80 mörk í 16 leikjum. Hann var í 35 manna landsliðshóp sem valinn var fyrir Evrópumeistaramótið í janúar og var til taks hér heima ef á hefði þurft að halda.


Hafþór Már verður ekki fyrsti Íslendingurinn til þess að leika með handknattleiksliði HC Empor Rostock. Elías Már Halldórsson, núverandi þjálfari Fredrikstad Bkl. í Noregi lék með liði hafnarborgarinnar við Eystrasalt keppnistímabilið 2007/2008. Félagið er fornt veldi í handknattleik en lið þess varð tíu sinnum austur-þýskur meistari á sínum tíma auk þess sem það varð Evrópumeistari 1982.

- Auglýsing -

Nýjustu fréttir

- Auglýsing -