Handboltaskólinn í Kiel 2022

Hópurinn sem er úti um þessar mundir á vegum Handboltaskólans í Kiel. Mynd/Handboltaskólinn í Kiel

Handboltaskólinn í Kiel byrjaði árið 2013 og hefur verið starfandi síðan og er búið að fara í 9 ferðir til Þýskalands, auk þess sem skólinn var árið 2020 á Selfossi vegna Covid 19. Alls hafa um 450 krakkar af öllu landinu verið í skólanum. Hugmyndin að skólanum er komin frá Árna Stefánssyni, honum fannst vanta svona skóla fyrir handboltakrakka, það var boðið upp á knattspyrnuskóla en ekkert fyrir handbolta. Árni viðraði þessa hugmynd við vin sinn Alfreð Gíslason sem var þá þjálfari hjá THW Kiel í Þýskalandi. Alfreð gaf vilyrði fyrir því að krakkarnir í skólanum mættu koma í heimsókn og horfa á æfingu hjá liðinu og hitta leikmenn liðsins. 

Undirbúningur fór strax á fullt og fyrsta ferðin var farin í júlí 2013. rúmlega 50 krakkar frá Reykjavíkursvæðinu, Akureyri, Selfossi og Vestmannaeyjum fóru í ferðina sem tókst mjög vel. Í þeirri ferð voru meðal annars landsliðsmennirnir Ómar Ingi Magnússon, Elliði Vignisson, Ýmir Örn Gíslason, Elvar Örn Jónsson og Hákon Daði Styrmisson og landsliðskonurnar Sandra Erlingsdóttir og Lovísa Thompson.  Síðan þá hafa bæst í hópinn fjölmargir unglingalandsliðsmenn og konur og mikill fjöldi leikmanna sem hafa verið í skólanum, eru í dag að spila í OLÍS-deildunum á Íslandi og sumir komnir út í atvinnumennsku.

Handboltaskólinn er fyrir íslenska krakka á aldrinum 13-17 ára og er þetta tíunda árið sem skólinn er haldinn. Skólinn er bæði fyrir stráka og stelpur og viljum við endilega fá sem flestar stelpur. Skólinn hefur slegið í gegn, krakkarnir hafa komið ánægðir heim og besta auglýsingin er að mörg fara aftur næsta ár og þeir sem hafa farið oftast hafa farið fjórum sinnum. Einnig er algengt að systkini hafi farið hvert á fætur öðru.

Um er að ræða æfingabúðir í eina viku þar sem krakkarnir búa í íþróttamiðstöð í þýska bænum Malente, skammt fyrir utan Kiel og æfa handknattleik við toppaðstæður. Aðstaðan er mjög glæsileg og er allt í sömu byggingunni, gistingin, maturinn, æfingarnar, fyrirlestrar og sundlaug.

Tvær handboltaæfingar eru á hverjum degi auk þess sem farið er í fjölmarga aðra þætti sem tengjast handboltanum, styrktaræfingar, liðleikaæfingar og æfingar til að minnka líkur á meiðslum. 

Áhersla er lögð á að bæta tækni krakkanna, auka leikskilning og samvinnu við aðra leikmenn. Æfingarnar eru einstaklingsmiðaðar og einnig er lagt mikið upp úr liðsheildinni. Þetta er drauma umhverfi fyrir unga handboltamenn sem vilja ná langt.

Í handboltaskólanum er lögð mikil áhersla á  markmannsþjálfun. Við erum með markmannsþjálfara sem sér alfarið um markmennina. Á hverri æfingu er sérstakur tími fyrir þá, þar sem farið er í grunnæfingar og tæknina, svo eitthvað sé nefnt. Undanfarin ár hefur verið gífurlega gaman að fylgjast með markmönnunum í skólanum okkar, því á einungis einni viku hafa þeir náð að bæta sig mikið og auka mikið við tækni í markinu.

Á hverjum degi verða fyrirlestrar þar sem krakkarnir eru fræddir um ýmsa hluti sem skipta máli fyrir þá sem vilja ná langt í handbolta, svo sem heilbrigt líferni, næringu,  hugarfar,  markmiðssetningu og fleira. Þá verða videofundir þar sem verður farið í leikfræði og horft á myndir frá leikjum meðal annars með Kiel og íslenska landsliðinu.

Stóri dagurinn í ferðinni er svo dagurinn með THW Kiel liðinu. Hópnum er boðið að koma og horfa á æfingu hjá stórliði THW Kiel. Krakkarnir fá að fylgjast með hvernig þeir bestu í heiminum æfa og hvað þeir þurfa að leggja á sig til að skara fram úr. Þetta er gott tækifæri fyrir krakkana til að fá innsýn í líf atvinnumanns í handbolta og sjá hvernig hlutirnir eru gerðir hjá bestu liðum heims. Krakkarnir fá að hitta leikmennina, fá að láta taka myndir af sér með þeim og fá hjá þeim eiginhandaráritanir.

Mikil áhersla hefur verið lögð frá upphafi á að fá bestu þjálfara landsins til að vera þjálfarar í skólanum og hefur það tekist mjög vel. Þjálfarar í skólanum sumarið 2022 verða: Árni Stefánsson sem er skólastjóri Handboltaskólans í Kiel, Stefán Árnason þjálfari yngri flokka hjá KA, Andri Snær Stefánsson þjálfari meistaraflokks kvenna hjá  KA/Þór, Ágúst Jóhannsson þjálfari kvennaliðs Vals og aðstoðarþjálfari íslenska kvennalandsliðsins, Jóhann Ingi Guðmundsson unglingaþjálfari og markmannsþjálfari hjá Haukum og Þórir Ólafsson unglingaþjálfari á Selfossi.

Auk þeirra hafa eftirtaldir verið þjálfarar í skólanum í gegn um tíðina: Arnar Pétursson þjálfari íslenska kvennalandsliðsins, Ásbjörn Friðriksson aðstoðarþjálfari FH, Erlingur Richardsson þjálfari ÍBV og hollenska landsliðsins, Hafdís Guðjónsdóttir þjálfari hjá HK, Hrafnhildur Skúladóttir þjálfari hjá ÍBV og þjálfari B landsliðs kvenna, Kristinn Guðmundsson þjálfari í Færeyjum, Óskar Bjarni Óskarsson þjálfari hjá Val, Patrekur Jóhannesson þjálfari Stjörnunnar, Samúel Árnason þjálfari hjá HK, Stefán Arnarson þjálfari meistaraflokks kvenna hjá Fram og Örn Þrastarson þjálfari kvennaliðs Selfoss.

Farið verður í tvær ferðir árið 2022 vegna mikilla vinsælda. Fyrri ferðin er 15. – 22.júlí og sú seinni 26.júlí – 2.ágúst. Skólinn kostar kr. 198.900.

Hægt er að finna Handboltaskólann í Kiel á Facebook: 

https://www.facebook.com/handboltaskolikiel/

og svo er komin ný heimasíða: HANDBOLTASKÓLINN Í KIEL.

Allar upplýsingar gefur Árni Stefánsson, netfang: arnistef@simnet.is, GSM: 8627576

- Auglýsing -

Nýjustu fréttir

- Auglýsing -