Hlaðvarpsþátturinn Handboltinn okkar er enn á ferðinni og að þessu sinni beindi tríóið sem hefur umsjón með þáttunum augum sínum að seinni leik Vals og Hauka í úrslitaeinvíginu í Olísdeild karla.
Að mati tríósins mættu Valsmenn virkilega ákveðnir til leiks í gærkvöld. Greinilegt var að þeir ætluðu sér að landa þeim stóra. Tríóið hrósaði Antoni Rúnarssyni sérstaklega. Þeim fannst hann vera frábær í úrslitakeppninni og stýra sínu liði virkilega vel. Þá hrósaði tríóið Snorra Steini Guðjónssyni þjálfara Vals sem sýndi að hann er virkilega fær þjálfari.
Haukarnir hins vegar ollu þeim miklum vonbrigðum. Haukarnir mættu hreinlega aldrei í þessa veislu sem úrslitaeinvígið var. Alltof margir leikmenn virtust ekki tilbúnir í slaginn og og svo var að sjá að menn væru að láta mótlætið fara í skapið á sér.
Í lok þáttarins var rætt um dómarana en Anton og Jónas dæmdu úrslitaleikinn virkilega vel og sýndu enn einu sinni að þeir eru besta dómarapar landsins. Tríóið hvatti aðra dómara að taka sér nálgun Jónasar og Antons í leikjum til fyrirmyndar.
