Hanna framlengir veruna í Eyjum

Hrafnhildur Hanna Þrastardóttir hvítklædd í leik með aðalliði ÍBV í Olísdeildinni. Mynd/Egill Bjarni Friðjónsson

Handknattleiksdeild ÍBV hefur samið við Hrafnhildi Hönnu Þrastardóttur til tveggja ára en hún er að ljúka sínu öðru keppnistímabili með Eyjaliðinu.


Hanna, eins og hún er oftast kölluð, gekk til liðs við ÍBV fyrir tveimur árum síðan. Hún var að glíma við meiðsli fyrri hluta yfirstandandi tímabils eftir að hafa leikið stórkostlega í úrslitakeppninni í fyrra, þegar liðið fór í undanúrslit og var hársbreidd frá því að komast í úrslit.


Hanna hefur verið að ná vopnum sínum aftur undanfarnar vikur, segir í tilkynningu handknattleiksdeildar ÍBV, og er komin á fullt með liðinu. ÍBV mætir Stjörnunni í fyrsta sinn í 1. umferð úrslitakeppninnar í Eyjum annað kvöld.


„Við hjá ÍBV eru afar ánægð að samkomulagið sé í höfn, enda er það stór þáttur í þeim plönum sem við höfum hjá kvennaliðinu fyrir næstu tímabil,“ segir orðrétt í tilkynningu handknattleiksdeildar ÍBV sem barst í pósthólf handbolta.is í kvöld.

- Auglýsing -

Nýjustu fréttir

- Auglýsing -