- Auglýsing -
Haukar halda efsta sæti Olísdeildar karla í handknattleik eftir öruggan sigur á Fram í áttundu umferð í Schenkerhöllinni á Ásvöllum í dag, 34:28. Haukar hafa 12 stig að loknum átta leikjum og eru tveimur stigum á undan Val og eiga þess utan leik til góða á Hlíðarendaliðið. Fram sem veitti Haukum keppni í fyrri hálfleik sitja í sjöunda sæti deildarinnar með sjö stig eftir átta leiki.
Sóknarleikurinn var í öndvegi í fyrri hálfleik í Shenkerhöllinni enda voru skoruð alls 37 mörk og hefðu þau hæglega geta orðið fleiri. Haukar voru með þriggja marka forskot þegar gengið var til búningsklefa að loknum hálfleiknum, 20:17.
Líkt og síðari hálfleik gegn Aftureldingu á miðvikudagskvöldið þá tóku leikmenn Hauka sig saman í andlitinu við varnarleikinn í síðari hálfleik. Andri Sigmarsson Scheving hrökk í stuð og varði vel, m.a. tvö vítaköst. Eftir að Fram náði að minnka muninn í eitt mark, 21:20, þá skildu leiðir liðanna. Hauka tóku völdin með varnarleik sinn að vopni. Þeir voru komnir með sjö marka forskot þegar tíu mínútur voru til leiksloka og segja má að sigurinn hafi aldrei verið í hættu.
Mörk Hauka: Darri Aronsson 9, Orri Freyr Þorkelsson 8, Geir Guðmundsson 6, Atli Már Báruson 3, Halldór Ingi Jónasson 3, Þráinn Orri Jónsson 2, Ólafur Ægir Ólafsson 1, Tjörvi Þorgeirsson 1, Jón Karl Einarsson 1.
Varin skot: Andri Sigmarsson Scheving 14/2 skot, 40% – Björgvin Páll Gústavsson 1 skot, 12,5%.
Mörk Fram: Vilhelm Pulsen 5, Þorgrímur Smári Ólafsson 5, Stefán Darri Þórsson 4, Andri Már Rúnarsson 3, Þorvaldur Tryggvason 3, Arnar Snær Magnússon 2, Kristófer Dagur Sigurðsson 2, Rógvi Christiansen 2, Breki Dagsson 1, Kristinn Hrannar Bjarkason 1.
Varin skot: Lárus Helgi Ólafsson 11 skot, 28,2% – Róbert Örn Karlsson 1 skot, 14,3%.
- Auglýsing -
