Haukar eru Íslandsmeistarar í 3. flokki karla. Þeir unnu Val í ótrúlegum úrslitaleik á Varmá í Mosfellsbæ í kvöld, 36:35. Úrslit fengust loks í bráðabana í vítakeppni en þá þegar var búið að framlengja leikinn einu sinni auk þess sem hvort lið hafði tekið fimm vítaköst. Eftir eina umferð í bráðabana tókst loks að krýna sigurvegara á Íslandsmótinu
Leikurinn var afar vel leikinn af báðum liðum og í raun slæmt að annað hvort þeirra þyrfti að ganga sært af velli.
Haukar voru marki yfir í hálfleik, 12:11. Jafnt var eftir 60 mínútna leik, 27:27. Enn stóðu leikar jafnir að lokinni tíu mínútna framlengingu, 31:31, og 35:35, eftir vítakeppni þar sem leikmenn beggja liða brást bogalistin einu sinni. Guðmundur Bragi Ástþórsson skoraði sigurmark Hauka í bráðabana og Magnús Gunnar Karlsson, markvörður og samherji Guðmundar Braga, varði vítakast frá Valsmanni í framhaldinu.
Guðmundur Bragi var valinn maður leiksins. Hann skorað helming marka Hauka, alls 18.
Mörk Vals: Áki Hlynur Andrason 9, Breki Hrafn Valdimarsson 9, Benedikt Gunnar Óskarsson 5, Andri Finnsson 4, Loftur Ásmundsson 3, Ísak Logi Einarsson 2, Tómas Sigurðsson 2, Knútur Gauti Eymarsson Kruger 1.
Mörk Hauka: Guðmundur Bragi Ástþórsson 18, Kristófer Máni Jónasson 4, Jakob Aronsson 4, Róbert Snær Örvarsson 3, Alex Máni Júlíusson 2, Össur Haraldsson 2, Magnús Gunnar Karlsson 1, Þorfinnur Máni Björnsson 1, Atli Steinn Arnarson 1.
