Haukar semja við efnilegan markvörð frá Akureyri

Handknattleiksdeild Hauka hefur samið við markvörðinn Ólöfu Maren Bjarnadóttur til næstu tveggja ára. Hún bætist við leikmannahóp Hauka fyrir næsta keppnistímabil.

Ólöf kemur til liðs við Hauka frá uppeldisfélagi sínu KA/Þór en þar hefur hún fengið smjörþefinn af Olísdeild kvenna og lék sex leiki með þeim í deildarkeppninni þetta tímabilið.

Ólöf Maren, sem er 19 ára, hefur undafarið verið í U-19 ára landsliðshóp Íslands og nú síðast var hún valin í lokahóp landsliðsins fyrir verkefni sumarsins.

„Hún mun því passa vel inn í hið unga og efnilega Haukalið og er Ólöf enn einn ungi leikmaðurinn sem skrifar undir samning við félagið,“ segir m.a. í tilkynningu frá handknattleiksdeild Hauka.