Leikmenn Vængja Júpiters hressir eftir kappleik á síðasta keppnistímabili. Mynd/Aðsend

Róbert Geir Gíslason, framkvæmdastjóri Handknattleikssambands Íslands, segir að hann telji víst að mál það sem kom upp úr dúrnum í gær vegna keppnisleyfis Vængja Júpiters sem skráð er á kennitölu sem var eða er ekki lengur gild hafi ekki áhrif á keppnisrétt liðsins. Vængir Júpiters hafi aðild að Íþróttabandalagi Reykjavíkur, ÍBR, og þar af leiðandi ÍSÍ. Þar með sé lið félagsins gjaldgengt á Íslandsmótinu í handknattleik. Ekkert félag á beina aðild að HSÍ heldur er aðild þeirra bundin við héraðssambönd eða íþróttabandalög sem eiga aðild að Íþrótta-, og Ólympíusambandi Íslands, ÍSÍ.


Vísar Róbert til fyrstu greinar í lögum HSÍ sem segir: „Handknattleikssamband Íslands, (HSÍ), er samband héraðssambanda og íþróttabandalaga þeirra félaga sem iðka, æfa og keppa í handknattleik innan ÍSÍ.“


„Eftir því sem ég fékk staðfest hjá ÍSÍ í dag þá eru Vængir Júpiters með staðfesta aðild að Íþróttabandalagi Reykjavíkur, ÍBR, og þar af leiðandi að ÍSÍ. Svo lengi sem Vængir Júpiters starfrækja handboltadeild og eru aðilar að ÍBR þá mega þeir senda lið til keppni á Íslandsmótinu í handknattleik,“ sagði Róbert í samtali við handbolta.is.


„Ég tel þar af leiðandi að þetta mál hafi ekki áhrif á keppnisrétt Vængja Júpiters hjá HSÍ,“ bætti Róbert við.


Spurður hvort hann þekkti til þess af hverju kennitala félags hafi verið afskráð sagði Róbert að eftir því sem hann kæmist næst hafi kennitalan verið afskráð af manni sem ekki hafði heimild til þess og að skráningin hafi þegar verið leiðrétt hjá þar til bærum yfirvöldum.

Kært til dómstóls HSÍ

Framangreint mál er sprottið upp úr tilkynnningu sem Vængir Júpiters sendu til mótanefndar vegna þess að Hörður tefldi fram leikmanni í viðureign liðanna í Grill 66-deild karla á dögunum sem var ekki skráður á leikskýrslu. Leikmaðurinn fékk rautt spjald þegar upp komst. Forráðamönnum Vængja þótti ekki nóg að gert og eftir að þeir töpuðu leiknum þá sendu þeir inn tilkynningu til mótanefndar. Nefndin felldi úrskurð sinn í vikunni og úrskurðaði Vængjum sigur í leiknum, 10:0, á þeim forsendum að Hörður hafi teflt fram ólöglegum leikmanni.


Úrskurð mótanefndar hafa forsvarsmenn Harðar kært til dómstóls HSÍ. Við undirbúning kærunnar kom í ljós að kennitala Vængja Júpiters var ekki á skrá. Róbert sagði kæru Harðar vera komna í venjubundið ferli hjá dómstólnum sem myndi vinna í málinu og skila niðurstöðu.

- Auglýsing -

Nýjustu fréttir

- Auglýsing -