Línukonan þrautreynda, Elísabet Gunnarsdóttir, hefur framlengt samning sinn við Stjörnuna til næstu tveggja ára. Elísabet hefur undanfarin ár leikið með Stjörnunni en hún var einnig árum saman með Fram. Hún hóf að æfa handknattleik á barnsaldri með ÍR en gekk til liðs við Stjörnuna 16 ára gömul.
Eftir nokkra dvöl hjá Stjörnunni söðlaði Elísabet um og lék með Fram áður en hún kom á ný til Stjörnunnar sumarið 2018. Elísabet hefur sex sinnum orðið Íslandsmeistari en einnig verið í sigurliði í bikarkeppninni. Hún á einnig 63 landsleiki að baki með A-landsliðinu og sem hún skoraði í 73 mörk.
„Hjá Stjörnunni er frábær hópur og þjáfarar, og allt teymið í kringum liðið er fyrsta flokks. Íþróttahúsið er mitt annað heimili, stelpurnar mínar æfa einnig þar. Allir þekkja starfsfólkið og allir sem starfa í kringum félagið eru dásamlegir,“ segir Elísabet í tilkynningu sem handknattleiksdeild Stjörnunnar sendi frá sér í morgun.
