Hentum þessu frá okkur í upphafi

Sigurður Bragason, þjálfari ÍBV. Mynd/Egill Bjarni Friðjónsson

„Leikmenn voru yfirspenntir. Við hentum leiknum frá okkur á fyrstu fimmtán mínútunum. Eftir það var verkefnið erfitt, nánast vonlaust,“ sagði Sigurður Bragason, þjálfari ÍBV, við handbolta.is í kvöld eftir að ÍBV steinlá fyrir Fram, 28:18, í fyrstu viðureign liðanna í undanúrslitum Olísdeildar kvenna í handknattleik. Leikið var í Safamýri.


„Við ræddum ákveðin atriði í hálfleik og ég var nokkuð sáttur við hvernig við byrjuðum síðari hálfleikinn, skoruðum tvö góð mörk og vörnin var fín. Svo fór allt aftur í sama farið,“ sagði Sigurður sem vissulega var vonsvikinn með að fá slíka útreið í fyrsta leik í undanúrslitum.


„Spennan var bara of mikil hjá mínu liði gegn geggjuðu Framliði sem elskar að fá að spila leik þar sem allt er á fullri ferð frá upphafi. Þetta var þar af leiðandi mjög erfitt og sérstaklega eftir upphafskaflann. Eftir hann var vonin úti.“


Næsti leikur liðanna verður í Vestmannaeyjum á mánudagskvöld og aftur verður flautað til leiks klukkan 19.40.


„Það er ákveðið áhyggjuefni að hafa ekki fengið betri leik. Við verðum að grafa djúpt á þeim skamma tíma sem við höfum til þess að leita lausna fyrir næstu viðureign. Við gerum okkar besta í Eyjum á mánudaginn, því get ég lofað,“ sagði Sigurður Bragason, þjálfari ÍBV, eftir tapið í Framhúsinu í kvöld.

- Auglýsing -

Nýjustu fréttir

- Auglýsing -