Vandi er innan landsliðs Grænhöfðaeyja eftir menn smituðust af kórónuveirunni. Mynd/IHF

Enn bætist í hóp þeirra landsliða sem taka þátt í HM í handknattleik þar sem kórónuveiran leikur lausum hala. Í morgun var greint frá því að bandaríska landsliðið væri meira og minna í einangrun eftir að átján smit uppgötvuðust innan hópsins. Nú segir norður-makedóníski netmiðillinn Ekipa.mk frá að hið minnsta sjö úr hópi landsliðs Grænhöfðaeyja hafi greinst smitaðir af kórónuveirunni.

Grænhöfðeyingar hafa verið í æfingabúðum í Portúgal síðustu daga og munu smitin hafa fundist við skimun þar áður en liðið bjó sig undir för til Kaíró. Ekki kemur fram hvort sjömenningarnir séu allir úr leikmannahópi landsins.
Grænhöfðeyingar taka nú þátt í HM í fyrsta skipti. Þeir verða í riðli með Ungverjalandi, Þýskalandi og Úrúgvæ sem einnig verður með í fyrsta skipti.


Auk smitanna innan landsliða Bandaríkjanna og Grænhöfðaeyja þá hefur ástandið verið afar slæmt hjá landsliðum Tékklands og Svíþjóðar. Hátt í tugur leikmanna Tékka hefur smitast að undanförnu auk beggja þjálfara. Þá hefur hver Svíinn á fætur öðrum hrokkið úr skaftinu og leikmannahópurinn verið meira og minna í sóttkví í nærri viku.

- Auglýsing -

Nýjustu fréttir

- Auglýsing -