Hófu úrslitakeppnina á 10 marka sigri

Aðalsteinn Eyjólfsson, þjálfari Kadetten Schaffhausen, fagnar með lærisveinum sínum í kappleik. Mynd/Kadetten Schaffhausen

Aðalsteinn Eyjólfsson og lærisveinar hans í Kadetten Schaffhausen unnu öruggan sigur á liði Bern, 38:28, í fyrstu viðureign liðanna í átta liða úrslitum um svissneska meistaratitilinn í handknattleik karla á heimavelli í kvöld. Vinna þarf þrjá leiki til þess að komast í undanúrslit.


Leikmenn Kadetten voru með fimm marka forskot, 18:13, að loknum fyrri hálfleik og sigldu nokkuð öruggum sigri í höfn í síðari hálfleik. Næsti leikur verður í Bern á föstudaginn en síðan líða sex dagar þangað til að þriðja leik kemur vegna þess að Kadetten á leik í millitíðinni í átta liða úrslitum Evrópudeildarinnar við Wisla Plock.


Kadetten varð deildarmeistari en liðsmenn Bern höfnuðu í áttunda sæti auk þess sem Kadettenliðið tapaði aðeins einum leik í deildarkeppninni á tímabilinu. Í ljósi þessa má reikna með að Kadettenliðið eigi bærilega von um að komast áfram.


Aðrar rimmur í átta liða úrslitum eru:
Pfadi Winterthur – St Gallen.
Wacker Thun – HC Kriens.
Suhr Aarau – Zürich.

- Auglýsing -

Nýjustu fréttir

- Auglýsing -