Hörður sektaður vegna „vítaverðrar framkomu“ orðháks

Mynd/Eyjólfur Garðarsson

Handknattleiksdeild Harðar á Ísafirði verður sektuð um 25.000 kr. vegna „vítaverðrar framkomu“ manns sem talið er yfir vafa hafið að hafi verið á vegum handknattleiksdeildar Harðar á leik liðsins við Val sem fram fór á dögunum í Origohöllinni er lið Harðar og Vals mættust í Grill66-deildinni.


„Af fyrirliggjandi gögnum málsins er ljóst að hlutaðeigandi aðili var á vegum handknattleiksdeildar Harðar, en orðaval hans á fyrrgreindri myndabandsupptöku rennir enn frekari stoðum undir það. Þó aðilum beri ekki saman um málsatvik, þá er hafið yfir vafa að mati aganefndar, að það orðfæri sem var viðhaft og lýst í skýrslu dómara, og heyrist að hluta til á fyrirliggjandi myndbandsupptöku, teljist vítaverð framkoma gagnvart starfsmönnum leiksins. Þá fær þetta frekari stoð í skýrslu handknattleiksdeildar Vals. Aganefnd telur því ljóst að umrætt atvik uppfylli öll skilyrði 1. mgr. 17. gr. reglugerðar HSÍ um agamál. Hreyfa þau sjónarmið sem reifuð eru í greinargerð handknattleiksdeildar Harðar ekki við því mati,“ segir í úrskurði afanefndar HSÍ frá 2. nóvember. Þar segir ennfremur:


„Með vísan til alls framangreinds, og mikilvægi íþróttamannslegrar háttsemi jafnt utan vallar sem innan, telur aganefnd að mál þetta varði sektum gagnvart handknattleiksdeild Harðar. Telur aganefnd með hliðsjón af atvikum málsins að sú sekt sé hæfilega ákvörðuð að fjárhæð kr. 25.000,- vegna þessa.“


Á sama fundi aganefndar var Aðalsteinn Ernir Bergþórsson leikmaður Þórs Akureyri úrskurðaður í eins leiks bann en Aðalsteinn hlaut útilokun með skýrslu vegna óíþróttamannslegrar hegðunar í leik í leik Þórs og Aftureldingar í Grill 66 deild karla á síðasta föstudag.


Nánar má lesa úrskurð aganefndar HSÍ frá í gær hér.

- Auglýsing -

Nýjustu fréttir

- Auglýsing -