KA og Fram áttust við í KA-heimilinu í gærkvöld í fyrstu umferð Olísdeildar karla í handknattleik. Að vanda var hart tekist á þegar þessi lið mættust. Báðum liðum er spáð veru í neðri hluta deildarinnar en víst er að leikmenn þeirra vilja blása á allar spár í upphafi móts.
Í hörkuleik var KA-liðið sterkara á lokasprettinum og vann með tveggja marka mun, 23:21. Patrekur Stefánsson innsiglaði sigurinn skömmu fyrir leikslok.
Lokaleikur fyrstu umferðar Olísdeildar fer í kvöld þegar FH og Valur eigast við í Kaplakrika klukkan 18.
Egill Bjarni Friðjónsson, hirðljósmyndari handknattleiksdeildar KA, var í KA-heimilinu í gærkvöld og fangaði stemninguna í leiknum. Handbolti.is fékk nokkrar myndir sendar frá Agli og úr varð neðangreind myndasyrpa úr hluta sendingarinnar. Gjörið svo vel. Kærar þakkir Egill.
