Hrókeringar markvarða á næstunni

Torbjorn Bergerud landsliðsmarkvörður Noregs yfirgefur Flensburg næsta sumar. Ekki liggur fyrir hvert leið hans mun liggja. Mynd/EPA

Danksi markvörðurinn Kevin Møller flytur á ný til Flensburg næsta sumar og leysir af Norðmanninn Torbjørn Bergerud sem hefur ákveðið að róa á önnur mið þegar samningur hans við félagið rennur út.


Møller var markvörður Flensburg frá 2014 til 2018 en fór þá um sumarið til Barcelona og hefur verið þar síðan og deilt stöðunni með Perez de Vargas, landsliðsmarkverði Spánar.


Hjá Flensburg mun Møller deila markvarðastöðunni með Bosníumanninum, Benjamin Burić.


Brottför Møllers frá Barcelona rennir stoðum undir óstaðfestar fregnir að landi hans, Emil Nielsen, flytji til Barcelona upp úr miðju næsta ár eftir tveggja ára veru hjá Nantes í Frakklandi.


Nielsen, sem er 23 ára gamall, þykir líklegur arftaki Niklas Landin sem aðalmarkvörður danska landsliðsins á næstu árum. Nielsen lék með Skjern í heimalandi sínu áður en hann gekk til liðs við Nantes.

- Auglýsing -

Nýjustu fréttir

- Auglýsing -