- Auglýsing -
ÍBV samdi í gær við færeyskan vinstri hornamann Janus Dam Djurhuus fyrir næsta keppnistímabil. Djurhus sem kemur frá færeyska meistaraliðinu H71 sem varð bæði færeyskur meistari og bikarmeistari á keppnistímabilinu sem lauk á dögunum. Lék piltur stórt hlutverk í meistaraliðinu, eftir því sem fram kemur í tilkynningu frá handknattleiksdeild ÍBV í morgun.
„Janus er tæknilega góður vinstri hornamaður, er fæddur árið 2002 og er hluti af flottum árgangi hjá H71 og færeyska U20 ára landsliðinu,“ segir ennfremur í tilkynningu ÍBV.
Djurhuus verður í hópnum hjá U20 ára liði Færeyja sem leikur á EM í Porto í Portúgal í sumar eins og íslenska landsliðið.
„Aðspurður segist Janus mjög spenntur fyrir því að koma til liðs við ÍBV en hann var meðal áhorfenda þegar liðið sigraði Stjörnuna glæsilega í gær. Hann telur að þessi félagaskipi séu gott skref í hans ferli og geti hjálpað honum að þróast sem handboltamaður,“ segir í tilkynningu ÍBV.
Fyrir eru í herbúðum ÍBV Færeyingarnir Dánjal Ragnarsson og Ingibjørg Olsen.
- Auglýsing -
