ÍBV treysti stöðu sína

Sigurður Bragason, þjálfari ÍBV og leikmenn leggja á ráðin. Mynd/Egill Bjarni Friðjónsson

ÍBV tryggði sér þriggja stiga forskot í fjórða sæti Olísdeildar kvenna í kvöld með því að leggja Aftureldingu, 31:28, í Vestmannaeyjum en um var að ræða frestaðan leik úr 16. umferð. ÍBV var fjórum mörkum yfir að loknum fyrri hálfleik, 17:13. ÍBV er þar með þremur stigum á undan Haukum þegar tvær umferðir eru eftir en liðin mætast á Ásvöllum á laugardaginn.


Aftureldingarliðið velgdi leikmönnum ÍBV undir uggum að þessu sinni og lék sennilega sinn besta leik í deildinni, alltént einn þann besta. Frumkvæðið var ekki síður hjá Aftureldingu á fyrstu 25 mínútum leiksins. Leikmenn ÍBV bættu aðeins í seglin undir lok hálfleiksins og voru fjórum mörkum yfir, 17:13 að honum loknum. Munurinn hefði hæglega getað verið þrjú mörk því Erla Rós Sigmarsdóttir, markvörður ÍBV, varði vítakast Katrínar Helgu Davíðsdóttir eftir að leiktíminn var úti.


Afturelding byrjaði síðari hálfleikinn vel, skoraði þrjú fyrstu mörkin. Í kjölfarið gáfust möguleikar á að jafna metin en ekki gekk rófan hjá Mosfellingum. ÍBV-liðið segi framúr en Afturelding var aldrei langt undan.


Sylvía Björt Blöndal fór á kostum og skoraði 14 mörk fyrir Aftureldingu. Réðu leikmenn ÍBV ekkert við hana. Var virkilega gaman að sjá að þótt staða Aftureldingar í deildinni sé slæm þá hafa leikmenn ekki lagt árar í bát.


Mörk ÍBV: Hrafnhildur Hanna Þrastardóttir 9/2, Harpa Valey Gylfadóttir 7, Þóra Björg Stefánsdóttir 5, Sunna Jónsdóttir 4, Elísa Elíasdóttir 3, Marija Jovanovic 2, Sara Dröfn Richardsdóttir 1.
Varin skot:
Erla Rós Sigmarsdóttir 13/1, 31,7%.

Mörk Aftureldingar: Sylvía Björt Blöndal 14/1, Katrín Helga Davíðsdóttir 5, Hrafnhildur Hólm Guðnadóttir 4, Drífa Garðarsdóttir 4, Lovísa Líf Helenudóttir 1.
Varin skot: Tanja Glóey Þrastardóttir 5, 16,1% – Eva Dís Sigurðardóttir 1, 16,7%.

Öll tölfræði leiksins er hjá HBStatz.

Staðan í Olísdeild kvenna.

Handbolti.is fylgdist með leiknum í Vestmannaeyjum í stöðu- og textauppfærslu hér fyrir neðan.

- Auglýsing -

Nýjustu fréttir

- Auglýsing -