Íslandsmeistarar Vals í handknattleik karla leika báða leiki sína gegn RK Porec í fyrstu umferð forkeppni Evrópudeildar Evrópu á heimavelli í króatíska liðsins. Valsmenn fara út þegar líður á næstu viku en fyrri viðureignin fer fram á föstudaginn eftir rúma viku. Sú síðari verður daginn eftir og er það skráður heimaleikur Íslandsmeistaranna.
Um verður að ræða fyrstu Evrópuleiki íslensks félagsliðs í nærri tvö ár. Ekkert varð úr þátttöku íslenskra liða í Evrópukeppninni á síðasta keppnistímabili. Nokkur lið voru skráð til leiks en þegar á hólminn var komið reyndust ferðalög til og frá landinu svo gott sem útilokuð vegna sóttvarnarreglna. Þess vegna drógu þau sig til baka eitt af öðru.
Karlalið Selfoss stígur næst af íslensku félagsliðunum fram á sviðið í Evrópukeppni. Selfoss mætir tékkneska liðinu Koprivnice í fyrstu umferð Evrópubikarkeppninnar um miðjan næsta mánuð.
Kvennalið ÍBV og Vals auk Íslandsmeistara KA/Þórs til viðbótar við karlalið FH og Hauka mæta til leiks í Evrópu þegar lengra líður inn á keppnistímabilið. Vinni Valsmenn RK Porec verða þeir einnig í eldlínunni í haust eða í byrjun vetrar.
