Flautað verður til leiks í Evrópudeildinni í handknattleik karla í kvöld þar sem hópur íslenskra handknattleiksmanna verður á fullri ferð á keppnistímabilinu. M.a. mætast tveir þeirra þegar danska liðið GOG með markvörðinn Viktor Gísla Hallgrímsson innanborðs sækir Kadetten Schaffahausen heim í D-riðli síðdegis. Aðalsteinn Eyjólfsson er þjálfari Kadetten.
Í sama riðli mætast Rhein-Neckar Löwen og Trimo Trebnje frá Slóveníu í Mannheim en Alexander Petersson og Ýmir Örn Gíslason leika með Löwen eins og kunnugt er. Uros Zorman er þjálfari Trebnje-liðsins en hann var árum saman einn besti handknattleiksmaður Slóvena.
Þriðja leiknum í riðlinum var frestað vegna kórónuveirunnar en það er viðureign Tatabanya og Pelister. Nær allir leikmenn Tatabanya eru í einangrun um þessar mundir en 15 veiktust í leik, – og starfsmannahópi liðsins í síðustu viku.
Alls er leikið í fjórum sex liða riðlum í Evrópudeildinni.
Aron Dagur Pálsson og samherjar í sænska liðinu Alingsås fá EK Nexe frá Króatíu í heimsókn í C-riðli. Í sama riðli mætast Beskitas og SC Magdeburg í Istanbul en Gísli Þorgeir Kristjánsson og Ómar Ingi Magnússon leika með þýska liðinu.
Ólafur Andrés Guðmundsson og Teitur Örn Einarsson sækja Füchse Berlin heim til Berlínar ásamt samherjum sínum í IFK Kristianstad í B-riðli.
Leikir dagsins í fyrstu umferð riðlakeppni Evrópudeildarinnar:
16.45 Alingsås (Aron Dagur) – Nexe
16.45 Besiktas – SC Magdeburg (Gísli, Ómar)
16.45 Kadetten (Aðalsteinn) – GOG (Viktor Gísli)
16.45 RN-Löwen (Alexander, Ýmir) – Trimo Trebnje
18.45 F. Berlin – IFK Kristianstad (Ólafur, Teitur)
16.45 Dinamo Bucarest – Sporting
18.45 Presov – Nimes
18.45 Toulouse – Metalurg Skopje
Medvedi – Ademar, frestað
Pelister – Tatabaya, frestað
Montpellier – CSKA, frestað