Ólafur Andrés Guðmundsson, fyrirliði IFK Kristianstad. Mynd/IFK Kristianstad - Mentor Selaci Fotograf, Studio11

Ólafur Andrés Guðmundsson og Teitur Örn Einarsson voru bestu menn IFK Kristianstad þegar liðið vann 14 marka sigur á Lugi frá Lundi í 7. umferð sænsku úrvalsdeildarinnar í handknattleik í kvöld. Leikið var í Kristianstad.

Ólafur og Teitur skoruðu sjö mörk hvor. Einnig áttu þeir níu markskot hvort. Ólafur átti fjórar stoðsendingar en Teitur Örn eina.

Kristianstad var með tögl og hagldir í leiknum frá upphafi til enda og hafði m.a. átta marka forskot eftir fyrri hálfleik, 18:10.

Kristianstad er efst sem fyrr með 14 stig að loknum sjö leikjum. Ystads IF er í öðru sæti með 11 stig eftir átta leiki. Malmö hefur 10 stig, einnig að loknum átta leikjum. Aron Dagur Pálsson og félagar í Alingsås er í fjórða sæti með níu stig, en hafa leikið sjö sinnum.

Daníel Freyr Andrésson kom ekkert við sögu þegar lið hans Guif tapaði á heimavelli fyrir Malmö, 30:21. Gamli sænski landsliðsmarkvörðurinn Dan Beutler fór á kostum í marki Malmö. Hann var með liðlega 46% hlutfallsmarkvörslu.

Guif er í 10. sæti af 15 liðum úrvalsdeildarinnar með 6 stig að loknum átta viðureignum.

- Auglýsing -

Nýjustu fréttir

- Auglýsing -