KA/Þór kemst ekki suður – leiknum við HK frestað á ný

Halldór Harri Kristjánsson og leikmenn HK fóru vel af stað á Ragnarsmótinu. Mynd/Egill Bjarni Friðjónsson.

Leik HK og KA/Þórs í Olísdeild kvenna hefur verið frestað öðru sinni en til stóð að hann færi fram í Kórnum í kvöld eftir að viðureigninni var slegið á frest í gær. Enn er ófært á hluta leiðarinnar milli Akureyrar og Reykjavíkur og ekki er líklegt að opnað verði strax sökum þess að enn er leiðindaveður með ofankomu og hvassviðri á norðan-, og vestanverðu landinu.

Lið KA/Þórs hefur verið í starholunum vegna brottferðar frá Akureyri síðan í rauðabítið í morgun. Nú þykir orðið útséð um að lagt verði af stað, eftir því sem handbolti.is hefur fregnað úr höfuðstað Norðurlands.

Í gær lagði KA/Þórsliðið af stað en fór ekki lengra en að Staðarskála í Hrútafirði. Þar var staldrað við áður en snúið var til baka heim til Akureyrar. Um sex stundir fór í ferðina fram og til baka.

Hugsanlega verður reynt að koma viðureign HK og KA/Þórs á dagskrá annað kvöld, föstudag. Bæði lið eiga innan sinna raða landsliðskonur sem eiga að hefja undirbúning á morgun fyrir þátttöku íslenska landsliðsins í forkeppni heimsmeistaramótsins um aðra helgi.

- Auglýsing -

Nýjustu fréttir

- Auglýsing -