Sandra Erlingsdóttir og samherjar í EH Aalborg unnu í dag Ringsted á heimavelli, 36:25, í dönsku B-deildinni í handknattleik kvenna. EH Aalborg er þar með komið upp í annað sæti deildarinnar með 30 stig eftir 19 leiki.
Ringköbing stendur best að vígi með 31 stig og á leik til góða á EH Aalborg, SönderjyksE, Ringsted og Hadsten sem er í fjórum næstu sætum. Aðeins eitt lið fer rakleitt upp í úrvalsdeild en liðin sem hafna í öðru og þriðja sæti fara í umspil við lið úr úrvalsdeildinni um laust sæti. Alls verða leiknar 22 umferðir og eiga flest liðin þrjá leiki óleikna hvert.
Sandra var næst markahæst hjá EH Aalborg í sigurleiknum í dag. Hún skoraði fimm mörk, þar af eitt úr vítakasti.
Jafnt var að loknum fyrri hálfleik, 14:14. Sandra og félagar tóku öll völd á leikvellinum í síðari hálfleik. Sérstaklega gekk sóknarleikur þeirra liðlega fyrir sig enda skoraði liðið 22 mörk.