Kveður Val og fer heim á Selfoss

Hulda Dís Þrastardóttir glöð með að hafa gengið á ný til liðs við Selfoss. Mynd: Umf. Selfoss / ÁÞG

Handknattleikskonan Hulda Dís Þrastardóttir snýr aftur heim á Selfoss eftir að hafa samið við handknattleiksdeild Selfoss til tveggja ára. Hulda Dís hefur leikið með Val undanfarin tvö ár.


Hulda Dís er uppalin Selfyssingur og ein fjögurra systkina sem öll hafa gert það mjög gott á handknattleiksvellinum. Hin eru Hrafnhildur Hanna, Haukur og Örn.


Hulda Dís hefur leikið með yngri landsliðum Íslands sem og B-landsliðinu.


„Það eru mjög góðar fréttir að þessi fjölhæfa handboltakona hafi ákveðið að taka slaginn á Selfossi í vetur.  Það eru spennandi tímar framundan í Olísdeildinni í vetur,“ segir í tilkynningu handknattleiksdeildar Selfoss sem boðar frekari fregnir af leikmannamálum á næstunni.


Selfoss vann sér sæti í Olísdeild kvenna í vor eftir nokkurra ára veru í Grill66-deildinni. Liðið er enn án þjálfara eftir að Svavar Vignisson sagði starfi sínu lausu í vor vegna anna í öðrum störfum.


a>
- Auglýsing -

Nýjustu fréttir

- Auglýsing -