Landsliðskonan í handknattleik og leikmaður Íslands- og deildarmeistara KA/Þórs, Ásdís Guðmundsdóttir, hefur skrifað undir nýjan tveggja ára samning við KA/Þór. Ásdís sem er 23 ára gömul er uppalin hjá KA/Þór og tók ung skrefið upp í meistaraflokk.
„Ásdís hefur verið algjör lykilleikmaður í okkar magnaða liði sem varð Íslandsmeistari og Deildarmeistari á nýliðinni leiktíð auk þess að verða Meistari Meistaranna. Hún gerði alls 85 mörk fyrir KA/Þór á síðustu leiktíð og tryggði sér svo sæti í A-landsliðinu með framgöngu sinni þar sem hún stóð heldur betur fyrir sínu,“ segir í tilkynningu frá KA/Þór en þess má geta að hún tók þátt í öllum fimm leikjum landsliðsins á nýliðnu keppnistímabili.
„Það er gríðarlega mikilvægt að halda Ásdísi áfram innan okkar raða og alveg ljóst að við ætlum okkur áfram að vera besta lið landsins. Framundan hjá KA/Þór er titilvörn sem og Evrópukeppni en kvennaliðið okkar hefur aldrei áður tekið þátt í Evrópukeppni og mikil spenna að sjá hver andstæðingur okkar verður þar,“ segir ennfremur í tilkynningu frá KA/Þórs.
„Ég er mjög sátt og sé fram á spennandi vetur þar sem nóg verður um að vera,“ sagði Ásdís í skilaboðum til handbolta.is í dag.
- Dagskráin: Kapphlaupið heldur áfram á þremur stöðum
- Myndasyrpa frá Eyjum: ÍBV – FH
- Molakaffi: Johannessen, Rød, Tønnesen, Carlsbogård, Dibirov, Olejniczak
- Olís kvenna: Úrslitakeppni, leikjadagskrá
- Umspil Olís karla: leikjadagskrá og úrslit
