Leika um fimmta sætið eftir stórsigur

Íslenska U19 ára landslið kvenna vann 14 marka sigur á Kósovó í morgun. Mynd/EHF

Íslenska landsliðið í handknattleik kvenna, skipað leikmönnum 19 ára og yngri, leikur um fimmta sætið í B-deild Evrópumótsins í handknattleik á morgun eftir stórisigur, 37:23, á landsliði Kósovó í dag. Þegar á daginn líður liggur fyrir hvort andstæðingur íslenska liðsins verður landslið Norður Makedóníu eða Finnlands.


Eins og tölurnar gefa til kynna þá var viðureignin í morgun í keppnishöll Vardar-liðsins í Skopje nánast eins og leikur kattarins að músinni. Rétt undir lok fyrri hálfleiks náðu leikmenn Kósovó að klóra í bakkann og breyta stöðunni úr 15:6 í 16:10 áður en hálfleikurinn var á enda.

Íslenska liðið herti tökin á ný í síðari hálfleik og vann yfirburðar sigur sem hefði getað orðið enn stærri en raun bar vitni enda skildi nánast himinn og haf liðin að í getu. Kósovó-liðið hefur unnið einn leik í keppninni til þessa, gegn Bosníu sem rak lestina í B-riðli.


Allir leikmenn íslenska landsliðsins að einum undanskildum fengu tækifæri til að spreyta sig í leiknum. Aðeins markvörðurinn Ingibjörg Gróa Guðmundsdóttir kom ekkert við sögu en hún hafði fram til þessa leikið mest af markvörðum liðsins. Þjálfararnir byrjuðu snemma að dreifa álaginu og skoruðu allir 13 útileikmenn liðsins mark.


Mörk Íslands: Sara Katrín Gunnarsdóttir 6, Elín Rósa Magnúsdóttir 5, Ásthildur Bertha Bjarkadóttir 4, Ída Margrét Stefánsdóttir 4, Katrín Helga Sigurbergsdóttir 4/4, Rakel Sara Elvarsdóttir 4, Bríet Ómarsdóttir 2, Emilía Ósk Steinarsdóttir 2, Júlía Sóley Björnsdóttir 2, Anna Mary Jónsdóttir 1, Hanna Karen Ólafsdóttir 1, Jóhanna Margrét Sigurðardóttir 1, Katrín Tinna Jensdóttir 1.
Varin skot: Signý Pála Pálsdóttir 5, Ólöf Marín Bjarnadóttir 5.

- Auglýsing -

Nýjustu fréttir

- Auglýsing -