„Varnarleikurinn er mjög góður hjá okkur. Að honum einbeitum við okkur núna og síðan er það næsta verk að bæta sóknarleikinn,“ sagði Halldór Harri Kristjánsson, þjálfari HK, við handbolta.is í kvöld eftir að lið hans tapaði 23:17 fyrir Val í lokaleik 2. umferðar Olísdeildar kvenna í handknattleik en leikið var í Kórnum í Kópavogi. HK er án stiga eftir tvo fyrstu leikina og hefur aðeins skorað 32 mörk í þeim.
„Við vorum að leika gegn sterku liði Vals að þessu sinni og sé tekið mið af leiknum við Hauka í fyrstu umferð þá var frammistaðan í dag mun betri og ber vott um framfarir. Við verðum að ná jafnbetri leikjum. Ákveðnin verður að vera meiri í sóknarleiknum sem er góður á köflum en verður mjög flatur lengst af. Liðið á mikið inni og því miður náðist það ekki fram að þessu sinni,“ sagði Harri ennfremur sem hefur nú þrjá vikur fram að næsta leik til þess að vinna í því með leikmönnum sínum að bæta það sem betur má fara í leik þeirra.
