„Maður verður að þora að taka skotin og vera yfirvegaður. Þetta datt hjá mér í dag,“ sagði Rakel Sara Elvarsdóttir sem skoraði sigurmark KA/Þórs í framlengdum oddaleik við ÍBV í undanúrslitum Olísdeildar kvenna í handknattleik, 28:27 í KA-heimilinu í dag.
Rakel Sara var skiljanlega í sjöunda himni með sigurinn en hún sagði hann fyrst og síðast vera að þakka sterkri liðsheild eins og í annarri viðureign liðanna í Vestmannaeyjum á miðvikudaginn.
„Liðsheildin er svo sterk hjá okkur og breiddin er góð og á því erum við að vinna leikina. En sigrarnir verða ekki sætari en þetta,“ sagði Rakel Sara sem hefur átt afar gott keppnistímabil með deildarmeisturunum.
„Stemningin var frábær í KA-heimilinu í dag og stuðningsmenn okkar frábærir. Það er magnað að hafa svona sterkan hóp á bak við okkur og hjálpar okkur svo sannarlega,“ sagði Rakel Sara sem var markahæsti leikmaður KA/Þórsliðsins að þessu sinni með sex mörk í sjö skotum.
Framundan hjá KA/Þór eru úrslitaleikir við Val um Íslandsmeistaratitilinn, sá fyrsti á miðvikudaginn í KA-heimilinu.
