Lilja snýr heim úr Svíþjóðardvöl

Lilja Ágústsdóttir leikur með Val á nýjan leik á næsta keppnistímabili. Mynd/Egill Bjarni Friðjónsson

Unglingalandsliðskonan Lilja Ágústsdóttir hefur ákveðið að ganga á ný til liðs við Val eftir að hafa verið í herbúðum sænska úrvalsdeildarliðsins Lugi síðan í upphafi árs.


Þetta kemur fram í tilkynningu sem handknattleiksdeild Vals sendi frá sér fyrir stundu. Þar segir ennfremur að til hafi staðið að Lija yrði á láni hjá Lugi í tvö og hálft ár eftir að hún stóð sig vel hjá liðinu við æfingar síðla á síðasta ári. Lilja vill hinsvegar snúa heim og ljúka námi.


„Það var frábær reynsla að fara til Lugi þó þetta hafi verið bara hálft tímabil. Ég vil koma heim og klára námið og stefni svo á að fara aftur út í atvinnumennsku en ég hlakka mikið til að spila aftur með Val í Olísdeildinni og klára síðasta árið í 3. flokknum,“ er haft eftir Lilju í tilkynningu handknattleiksdeildar Vals.


Lilja er einn af efnilegri handknattleikskonum landsins og hefur leikið með meistaraflokki Vals síðastliðin tvö keppnistímabil. Hún er ein af kjölfestum í 18 ára landsliði Íslands sem tekur þátt í heimsmeistaramótinu sem fram fer í lok júlí og í byrjun ágúst.


Ásdís Þóra, systir Lilju, heldur sínu striki með Lugi og mætir galvösk til leiks í haust eftir erfið meiðsli sem héldu henni frá keppni nær alla síðustu leiktíð.

a>
- Auglýsing -

Nýjustu fréttir

- Auglýsing -