Sergey Shishkarev, forseti rússneska handknattleikssambandsins, einn sterkefnaðasti maður landsins og fyrrverandi þingmaður, lofar leikmönnum kvennalandsliðsins gulli og grænum skógum verði landsliðið í allra fremstu röð á Ólympíuleikunum í sumar. Shishkarev segir að mikið álag fylgi undirbúningi og þátttöku fyrir leikana sem komi mjög niður á samvistum leikmanna við maka, börn og aðra nána úr fjölskyldunni. Þar á ofan þá takmarkaði þátttakan sumarfrí.


Rússneska kvennalandsliðið varð Ólympíumeistari 2016. Allt kapp er lagt á að endurtaka leikinn að þessu sinni og bæta þar með um leið upp fyrir vonbrigðin af Evrópumótinu í Danmörku í desember þegar Rússar höfnuðu í fimmta sæti.


Shishkarev sagði eftir fund með leikmönnum á dögunum að opinberlega ríkti leynd yfir þeim fjárhæðum sem leikmönnum stæði til boða fyrir góðan árangur. Um væri að ræða verulegan búhnykk fyrir hvern og einn.


Shishkarev á m.a. flutningafyrirtækið Delo sem er stærsti bakhjarl Meistaradeildar Evrópu í kvennaflokki.

- Auglýsing -

Nýjustu fréttir

- Auglýsing -