Lögðu ÍBV en máttu gera sér silfrið að góðu

Mynd/Egill Bjarni Friðjónsson

Spænska handknattleiksliðið Costa del Sol Málaga, sem batt enda á sigurgöngu ÍBV í átta liða úrslitum Evrópubikarkeppninnar í handknattleik kvenna snemma á þessu ári, tapaði naumlega í úrslitum keppninnar um helgina á færri mörkum skoruðum á útivelli. Annað spænskt lið, Rocasa Gran Canaría stóð uppi sem sigurvegari.


Costa del Sol Málaga vann síðari viðureignina í Málaga á laugardaginn með fjögurra marka mun, 29:25. Sigurinn dugði ekki til. Fyrri úrslitaleikurinn, sem fram fór í Telde á Gran Canaría fyrir rúmri viku lauk, með sigri Rocasa Gran Canaría, 21:17. Samanlögð úrslit, 46:46 í úrslitaleikjunum tveimur.


Þess má geta að Alba Spugnini skoraði 25. mark Rocasa Gran Canaría þegar níu sekúndur voru til leiksloka. Markið sem reið baggamuninn fyrir liðið.


Þess má til gamans geta að 7.183 voru í Jose Maria Martin Carpena Palacio de los Deportes keppnishöllinni. Það er metfjöldi á handboltaleik kvenna á Spáni.



Rocasa Gran Canaría vann þar með keppnina á fleiri mörkum skoruðum á útivelli. Sú regla verður felld niður að loknum þessu keppnistímabili í mótum á vegum Hanndknattleikssambands Evrópu. Þess í stað verður tekin upp vítakeppni verði liðin jöfn að markatölu eftir tvo leiki.


Costa del Sol Málaga vann Evrópubikarkeppni kvenna á síðasta ári. Rocasa Gran Canaría vann forvera Evrópubikarkeppninnar, Áskorendakeppni Evrópu, 2016 og 2019.


- Auglýsing -

Nýjustu fréttir

- Auglýsing -