Loksins leikið í Póllandi

Eftir nærri þriggja vikna hlé frá keppni í pólsku úrvalsdeildinni þá var blásið til leiks hjá meistaraliðinu Vive Kielce í dag og eins og oftast áður þá vann liðið öruggan sigur á heimavelli þegar lið Gwardia Opole kom í heimsókn, 39:24. Sigvaldi Björn Guðjónsson skoraði fjögur mörk fyrir Kielce og lék helming leiksins eins og yfirleitt áður.

Haukur Þrastarson er sem kunnugt er meiddur og verður ekki meira með Kielce á leiktíðinni.

Kielce var með sex marka forskot að loknum fyrri hálfleik, 18:12. Liðið er í efsta sæti deildarinnar ásamt Azoty Pulawy með 12 stig að loknum fjórum umferðum en gefin eru þrjú stig fyrir sigur í pólsku úrvalsdeildinni.