Lugi og Lilja eru í álitlegri stöðu

Lilja Ágústsdóttir leikmaður Lugi í Svíþjóð. Mynd/EHF

Lugi frá Lundi, sem þær systur Ásdís Þóra og Lilja Ágústsdætur eru samningsbundnar hjá og leika með, er komið í vænlega stöðu gegn Kungälvs í átta liða úrslitum sænsku úrvalsdeildarinnar í handknattleik. Lugi hefur tvo vinninga en Kungälvs-liðið er tómhent eftir sex marka sigur Lugi, 27:21, á heimavelli í kvöld í annarri viðureign liðanna.


Lugi vann fyrri leikinn sem fram fór á fimmtudaginn einnig með sex marka mun, 30:24, og getur gert út um einvígið á heimavelli Kungälvs á laugardaginn. Þrjá vinninga þarf til að komast í undanúrslit.


Lilja var í liði Lugi í kvöld en skoraði ekki mark. Ásdís Þóra er á sjúkralista eftir að hafa slitið krossband fyrir um ári.

Staðan jöfn að loknum fyrri hálfleik í Lundi í kvöld, 11:11.


Sävehof og Skuru IK standa einnig vel að vígi eftir tvo sigurleiki hvort gegn sínum andstæðingum. Meiri spenna ríkir hjá Höörs HK 65 og Skara HF. Staðan er jöfn, hvort lið hefur einn vinning.

- Auglýsing -

Nýjustu fréttir

- Auglýsing -