Örvhenta skyttan, Ásgeir Snær Vignisson, lék á ný með ÍBV í gær eftir nærri fjögurra mánaða fjarveru vegna meiðsla. Hann skoraði tvö mörk á heimavelli í gærkvöld gegn gömlu samherjum sínum í Val í fyrri undanúrslitaleik liðanna um Íslandsmeistaratitlinn.
Ásgeir Snær, kom til Eyja á síðasta sumri. Hann lék síðast með ÍBV gegn KA í Olísdeildinni á heimavelli 15. febrúar.
Ásgeir Snær hefur verið einstaklega óheppinn með alvarleg meiðsli á keppnistímabilinu. Í byrjun október fór Ásgeir Snær úr axlarlið eftir að hafa hlotið slæma byltu í leik við Val. Fljótlega eftir að keppni fór af stað í Olísdeildinni í lok janúar mætti Ásgeir Snær galvaskur til leiks og náði nokkrum viðureignum með Eyjamönnum áður en hann meiddist á ný. Núna er beina brautin vonandi framundan.
