Mark úr vítakasti tryggði Gróttu annað stigið

Grótta önglaði í annað stigið í heimsókn til Valsara í kvöld. Mynd/Eyjólfur Garðarsson

Gróttu tókst aðeins að taka með sér annað stigið úr heimsókn sinni í Orighöll Valsara í kvöld þegar lið Seltirninga sótt ungmennalið Vals í Grill66-deild kvenna í handknattleik, lokatölur 25:25, í hörkuleik.


Grótta var með þriggja marka forskot í hálfleik, 15:12. Valsliðið gaf sinn hlut ekki eftir átakalaust í síðari hálfleik og því fór sem fór. Grótta var marki undir þegar hálf mínúta var til leiksloka en tókst að jafna metin úr vítakasti áður en leiktíminn var úti. Því miður fylgir ekki sögunni hver skoraði úr vítakastinu góða.


Þrátt fyrir eitt stig þá heldur Grótta fjórða sæti deildarinnar með 18 stig að loknum 16 leikjum og hefur alveg misst af lestinni í keppninni um efstu sætin þrjú þar sem leikmenn FH, ÍR og Selfoss berjast hart um að komast beint upp í Olísdeildina á næstu leiktíð.


Ungmennalið Vals siglir lyngnan sjó í neðri hlutanum með 12 stig.


Mörk Vals U.: Hanna Karen Ólafsdóttir 7, Elín Rósa Magnúsdóttir 5, Ída Margrét Stefánsdóttir 4, Auður Ester Gestsdóttir 3, Guðrún Hekla Traustadóttir 3, Brynja Katrín Benediktsdiktsdóttir 2, Berglind Gunnarsdóttir 1.

Mörk Gróttu: Katrín Helga Sigurbergsdóttir 6, Rut Bernódusdóttir 6, Valgerður Helga Ísaksdóttir 5, Katrín Anna Ásmundsdóttir 4, Anna Katrín Stefánsdóttir 2, Hrafnhildur Hekla Grímsdóttir 2.
Soffía Steingrímsdóttir varð 12 skot í mark Gróttu.


Stöðu og næstu leiki í Grill66-deild kvenna er að finna hér.

- Auglýsing -

Nýjustu fréttir

- Auglýsing -