Markaveisla í Varberg

Teitur Örn Einarsson skoraði þrjú mörk þegar IFK Kristianstad vann HK Varberg á útivelli, 39:29, í bráðfjörugum leik í sænsku úrvalsdeildinni í handknattleik í dag. IFK heldur þar með áfram efsta sæti deildarinnar. Liðið hefur nú 16 stig að loknum níu leikjum, er tveimur stigum á undan Malmö sem hefur leikið einum leik fleira. Ystads IF er í þriðja sæti með 13 stig eftir níu umferðir.

Teitur Örn átti einnig fjórar stoðsendingar og var vísað einu sinni af leikvelli. Ólafur Andrés Guðmundsson, fyrirliði IFK, tók ekki þátt í leiknum vegna meiðsla.

Leikmenn IFK voru með sannkallaða flugeldasýningu í fyrri hálfleik þegar þeir skoruðu 23 mörk gegn 11 mörkum heimamanna.