Alfreð Gíslason landsliðsþjálfari Þýskalands í handknattleik karla. Mynd/EPA

„Markmið okkar er að komast í undanúrslit. Til þess að svo megi verða verðum við að vinna eitthvað af sterkari liðunum í okkar riðli,“ segir Alfreð Gíslason, landsliðsþjálfari Þýskalands í handknattleik karla í samtali við þýska fjölmiðla í aðdraganda Ólympíuleikanna. Alfreð og þýska liðið kom til Japans í síðustu viku og mætir Evrópumeisturum Spánar í fyrstu umferð handknattleikskeppni leikanna á laugardaginn eða aðfaranótt laugardagsins að íslenskum tíma.


Þýska liðið verður í riðli með Frakklandi, Noregi, Brasilíu og Argentínu auk Spánar í A-riðli. „Þetta eru mjög jöfn lið og það má vart sjá á milli Frakka, Norðmanna, Spánar og okkar í getu. Lið Argentínu og Brasilíu má alls ekki vanmeta,“ segir Alfreð ennfremur.


Fyrir dyrum stendur hjá þýska liðinu að færa sig frá Tokushima þar sem það hefur verið síðan í síðustu viku og til Tókýó og inn í Ólympíuþorpið þar sem mjög stífar reglur gilda vegna kórónuveirunnar.


Alfreð segir að til hafi staðið að þýska liðið léki æfingaleik við landslið Barein, sem Aron Kristjánsson þjálfar. Hætt hafi verið við leikinn vegna þess að landslið Barein fékk ekki heimild til þess að koma til Tokushima. Af þeim sökum hefur þýska liðið ekki leikið síðan það mætti Egyptum og Brasilíumönnum áður en það fór frá Þýskalandi.


Allir leikmenn þýska liðsins eru klárir í slaginn. Þeir leikmenn sem kenndu sér lítilsháttar meiðsla fyrr í mánuðinum eru orðnir heilir heilsu. „Við vonum að ástandið verði svo gott áfram,“ segir Alfreð ennfremur en hann tekur nú í fyrsta sinn þátt í Ólympíuleikum sem þjálfari en hann lék með íslenska landsliðinu á leikunum 1984 og 1988.


Fram kemur í samtali við Alfreð í þýskum fjölmiðlum að hann og liðið fái aðeins 45 mínútna æfingu á föstudaginn, daginn fyrir fyrsta leik.

- Auglýsing -

Nýjustu fréttir

- Auglýsing -