Markvörður frá Fram til Vals

Markvörðurinn Sara Sif Helgadóttir gengur til liðs við Val í sumar en hún hefur frá áramótum verið í herbúðum Fram. Hún hefur skrifað undir þriggja ára samning við Valsliðið og kemur í stað Margrétar Einarsdóttur sem samdi við Hauka á dögunum.

Sara Sif var á síðasta tímabili lánsmaður hjá HK frá Fram. Einnig lék hún með HK fram að áramótum að Framarar kölluðu hana til baka úr láni vegna meiðsla meðal markvarða liðsins.

„Sara Sif er efnilegur markmaður sem hefur spilað fyrir yngri landslið Íslands ásamt því að hafa verið valin í A- og B landsliðshóp á undanförnum árum,“ segir m.a. í tilkynningu frá Val.

Fyrir er í herbúðum Vals Saga Sif Gísladóttir, landsliðsmarkvörður.