- Auglýsing -
Handknattleiksmaðurinn Sigtryggur Daði Rúnarsson og liðsmaður ÍBV meiddist á baugfingri í viðureign ÍBV og Selfoss á sunnudaginn. Af þeim sökum var hann ekki með ÍBV í gær þegar liðið sótti Stjörnuna heim og vann með fjögurra marka mun, 32:28, í Olísdeild karla.
Fingurinn er í spelku. Sigtryggur Daði sagði við handbolta.is eftir leikinn í TM-höllinni, þar sem hann var á meðal áhorfenda, að liðbönd í fingrinum hefðu skaddast vegna höggs snemma leiksins við Selfoss. Hann hefði látið sig hafa það að taka þátt í leiknum til enda en fengið að súpa seyðið af því þegar frá leið. Spelkan væri um fingurinn til að forðast hnjask og flýta þar með fyrir bata.
Sigtryggur Daði sagði óvíst hvort hann verður klár í slaginn á sunnudaginn þegar ÍBV sækir Gróttu heim í Hertzhöllin í 10. umferð Olísdeildarinnar.
- Auglýsing -
