„Við megum ekki við minnstu mistökum við framkvæmd mótsins. Enginn má kasta til höndunum í sóttvörnum. Það er svo mikið í húfi fyrir íþróttina,“ segir Hassan Moustafa, forseti Alþjóða handknattleikssambandsins, IFH, í samtali við Mannheimer Morgen í dag þar sem væntanlegt heimsmeistaramót í handknattleik karla er til umræðu.
Að halda heimsmeistaramót í skugga heimsfaraldurs sætir sífellt meiri gagnrýni, ekki síst í Þýskalandi. Þar hefur verið vaxandi þungi í umræðunni síðustu vikur. Nærri þriðjungur leikmanna þýska landsliðsins sem tók þátt í tveimur leikjum í undankeppni EM í byrjun þessa mánaðar smitaðist af kórónuveirunni. M.a. af þeim sökum er leikjadagskrá í 1. deild karla í þýska handboltanum gengin úr skorðum.
Forsetinn hefur ekki kvikað frá þeirri áætlun að heimsmeistaramótið fari fram á tilsettum tíma, frá 13. til 31. janúar. Hann leggur allt sitt traust á öflugar sóttvarnir í kringum mótið og segir þær ekki vera sambærilegar þeim sem voru viðhafðar í kringum leiki þýska landsliðsins í byrjun þessa mánaðar.
Ekki slegið slöku við skimun
„Þeir sem kom til landsins til að taka þátt í HM fara í skimun á flugvelli við komu til Egyptalands. Aftur verður prófað á hótelinu og eftir það á 72 klukkustundafresti mótið á enda. Allir munu búa í „búbblum“. Starfsfólk á hótelum verður undir sömu reglum og leikmenn, svo dæmi sé tekið,“ segir Moustafa.
„Við munu ekki hika við að grípa til allra mögulegra ráða með að markmiði að tryggja heilbrigði allra sem að mótinu koma, hvaða hlutverki sem þeir gegna,“ segir Hassan Moustafa, forseti IHF, ákveðinn að vanda.
