Meistararnir í úrslit – oddaleikur hjá Viktori Gísla

Viktor Gísli Hallgrímsson markvörður GOG, er danskur meistari í handknattleik. Mynd/GOG

Danmerkurmeistarar Aalborg eru komnir áfram í úrslit um danska meistaratitilinn eftir að hafa unnið Bjerringbro/Silkeborg öðru sinni í undanúrslitum í kvöld, 31:26. Aron Pálmarsson var ekki í leikmannahópi Aalborg í kvöld en hann hefur ekki leikið með liðinu síðustu tvær vikur vegna meiðsla.


Aalborg mætir annað hvort Skjern eða GOG í úrslitum um danska meistaratitilinn.


Arnór Atlason aðstoðarþjálfari Aalborg var að vanda á sínum stað þjálfaranum Stefan Madsen til halds og trausts. Nikolaj Læsö var markahæstur hjá Aalborg með sjö mörk og Rene Antonsen var næstur með sex mörk.


Viktor Gísli Hallgrímsson kom ekki mikið við sögu þegar lið hans, GOG, tapaði á útivelli fyrir Skjern í annarri viðureign liðanna í undanúrslitum dönsku úrvalsdeildarinnar í handknattleik í kvöld, 30:27. Viktor Gísli fékk stuttan tíma í markinu og spreytti sig á fjórum skotum án þess að fá vörnum við komið.

Staðan er jöfn, hvort lið hefur einn vinning. Þau mætast í oddaleik á heimavelli GOG á laugardaginn.


- Auglýsing -

Nýjustu fréttir

- Auglýsing -