Mikil áskorun fyrir mig að koma Þór upp í efstu deild

Stevce Alusovski, þjálfari Þórs. Mynd/Páll Jóhannesson

„Ég er mjög ánægður með að vera á Akureyri og að starfa fyrir Þór. Ég vil vera áfram í félaginu vegna þess að mér finnst verkefni næstu ára gríðarlega spennandi; ég tel okkur hafa mjög mikla möguleika á að búa til lið sem getur fest sig í sessi í efstu deild, það er mitt verkefni og annarra sem vinna fyrir félagið að tryggja að það takist,“ segir Norður Makedóníumaðurinn Stevce Alusovski í samtali við Akureyri.net í tilefni þess að hann skrifaði á dögunum undir þriggja ára samning við Þór í framhaldið af því að hafa þjálfað hjá félaginu frá síðasta sumri.


Koma Alusovski til Þórs á sínum tíma vakti gríðarlega athygli enda hafði hann þá stýrt stórliði Vardar Skopje tímabilið 2020/2021 þegar það lék í Meistaradeild Evrópu. Fram kom í samtali við Árna Rúnar Jóhannsson við undirritun þriggja ára samningsins við Alusovski að hinn síðarnefndi hafi haft úr fleiri tilboðum að velja þegar hann valdi þann kost að vera áfram hjá Þór.


„Mörg félög höfðu samband við mig en mér fannst verkefnið hér strax spennandi og hér hef ég allt til alls. Aðstæður eru mjög góðar, margir ungir og efnilegir strákar og það er gott fólk sem starfar fyrir Þór,“ segir Alusovski við Akureyri.net og bæti við að markmið sitt sé að koma Þór upp í Olísdeildina og að félagið festi sig í sessi þar.


„Það er mjög mikil áskorun fyrir mig og ekki síst þess vegna þykir mér verkefnið svo spennandi,“ segir Stevce Alusovski.


Viðtal Akureyri.net við Alusovski í heild sinni er hægt að nálgast hér.

- Auglýsing -

Nýjustu fréttir

- Auglýsing -