„Þetta var kannski ekki fallegasti handboltaleikur sem hér hefur farið fram í Hleðsluhöllinni. Baráttan var í fyrirrúmi hjá báðum liðum,“ sagði Guðmundur Hólmar Helgason, leikmaður Selfoss eftir kærkominn baráttusigur liðsins á ÍBV í Olísdeild karla í gærkvöld, 27:25. Með sigrinum batt Selfossliðið enda á hrinu þriggja tapleikja í röð.
„Við unnum kærkominn og innilega mikilvægan sigur,“ sagði Guðmundur Hólmar sem viðurkenndi að leikmenn Selfoss hefðu á tíðum í leiknum farið illa að ráði sínu, einkum í fyrri hálfleik. Hann vildi ekki skrifa það á reikning aga-, eða einbeitingaleysis en viðurkenndi að vart hafi verið við kafla í síðustu leikjum Selfoss þar sem ekki hafi alltaf verið valinn besti kosturinn.
„Þá höfum við stundum fallið í þá gryfju að svekkja okkur yfir því sem betur hefur mátt fara. Í dag létum við þessi atriði ekki slá okkur út af laginu heldur héldum bara áfram að berjast,“ sagði Guðmundur sem tók undir með blaðamanni að leikur liðsins hafi verið betri í síðari hálfleik.
„Heilt yfir var það léttir að sjá hvernig við mættum til leiks og lékum þennan leik eftir vonbrigðin á mánudaginn þegar við töpuðum hérna heima gegn Gróttu. Þá vorum við langt í frá eins og við viljum vera. Gegn Gróttu lékum við ekki sem liðsheild heldur frekar eins og einstaklingar. Annað var upp á teningnum að þessu sinni.“
Fann orkuna frá áhorfendum
Liðlega 100 áhorfendur voru á leiknum í Hleðsluhöllinni í gærkvöld sem settu mikinn svip eins og nærri má geta enda tóku þeir þátt í leiknum af lífi og sál eins og leikmenn. Guðmundur segir nærveru áhorfenda, þótt þeir hafi ekki verið fleiri, gjörbreyta leiknum. „Stemningin gjörbreytist og gefur okkur leikmönnum helling. Maður finnur orkuna frá áhorfendum. Það er magnað,“ sagði Guðmundur Hólmar Helgason, leikmaður Selfoss í samtali við handbolta.is í Hleðsluhöllinni í gærkvöld.
