- Auglýsing -
- Talsvert rót hefur verið á handknattleiksmanninum Darko Dimitrievski síðustu árin. Á dögunum samdi hann við Atletico Valladolid á Spáni en það er tólfta liðið sem hann leikur með á 10 árum. Síðast var Norður Makedóníumaðurinn hjá þýska liðinu TV Emsdetten en þar á undan m.a. með RK Kumanovo, Qatar Sports Club, Puerto Sagunto, Ademar León, Csurgói KK, RK Metalurg, RK Borec, RK Metalurg, Hapoel Ashdod og Sinfín.
- Hollenska handknattleikskonan Danick Snelder leikur ekki með þýska meistaraliðinu Bietigheim næstu mánuði vegna meiðsla í hné. Til að hlaupa í skarðið fyrir Snelder hefur Bietigheim krækt í Annika Meyer sem var samningsbundin Thüringer HC.
- Sænska landsliðskonan Mikaela Mässing hefur ákveðið að taka frí frá handknattleik um ótiltekinn tíma. Hún hefur átt í þrálátum meiðslum undanfarin ár og hefur fengið nóg. Mässing hefur komið sér fyrir heima í Gautaborg þar sem hún ætlar í friði og ró að ná líkamlegri heilsu á nýjan leik og ráða sig í daglaunavinnu. Mässing sló í gegn með sænska landsliðinu á HM 2019. Framtíðin verður að leiða í ljós hvort hún tekur upp þráðinn sem atvinnukona í handknattleik á nýjan leik.
- Auglýsing -
