- Auglýsing -
- Ágúst Elí Björgvinsson átti góðan leik í marki Kolding í gærkvöldi en það dugði ekki þegar liðið sótti nágrannaliðið Fredericia heim í dönsku úrvalsdeildinni í handknattleik, lokatölur, 35:33, eftir jafna viðureign. Ágúst Elí varði 11 skot, þar af eitt vítakast sem lagði sig út á 28% markvörslu. Kolding er í 12. sæti af 15 liðum með sex stig eftir 11 leiki en liðin fyrir neðan eiga öll leik til góða.
- Elín Jóna Þorsteinsdóttir og samherjar hennar í Ringköbing áttu erfitt uppdráttar á móti hinu sterka liði Herning-Ikast í Herning í gærkvöldi. Máttu þær sætta sig við 10 marka tap, 38:28, eftir að hafa verið 20:12 undir í hálfleik. Elín Jóna stóð í marki Ringköbing hluta leiksins og varði fjögur skot, 19%. Ringköbing er í 13. og næst neðsta sæti deildarinnar með sex stig eftir 13 umferðir en deildarkeppnin er nú hálfnuð.
- Steinunn Hansdóttir var í sigurliði Skanderborg Håndbold þegar liðið vann Randers óvænt á útivelli í dönsku úrvalsdeildinni í gærkvöld, 23:22. Steinunn skoraði ekki mark í leiknum en var einu sinni vísað af leikvelli. Skanderborg skaust upp í 9. sæti deildarinnar með sigrinum. Hin sænsk/íslenska Kristín Þorleifsdóttir skoraði fimm mörk fyrir Randers er féll niður í 12. sæti við þetta tap á heimavelli.
- Amo HK, sem leikur í næst efstu deild sænska karlahandknattleiksins sló í gær Bjarna Ófeig Valdimarsson og félaga í úrvalsdeildarliði Skövde út í átta liða úrslitum sænsku bikarkeppninnar í handknattleik. Amo HK, sem er frá Alstermo þar sem búa ríflega 800 manns, vann báða leiki liðanna í átta liða úrslitum. Sá síðari fór fram í Skövde í gær. Amo HK vann 40:39 eftir að hafa unnið á heimavelli 36:32, í fyrri viðureigninni. Bjarni Ófeigur skoraði 10 mörk í leiknum í gærkvöld og var valinn besti leikmaður Skövde.
- Axel Stefánsson stýrði liði Storhamar til sigurs á Flint Tønsberg í norsku úrvalsdeild kvenna í handknattleik í gærkvöldi, 30:23. Leikið var í Tønsberg. Storhamar situr í öðru sæti deildarinnar þremur stigum á eftir Vipers Kristiansand sem er fáum að óvörum í efsta sæti.
- Auglýsing -
